Kaótískar bókahillur

Hollendingarnir Sloom & Slordig hönnuðu bókahillurnar Pile Cap. Þær eru ekki beint praktískar - meira svona eins og innsetning - en ansi smart.

Er þetta hægt?

Það eru ekki vandræði að ryksuga undir þessu rúmi - ótrúlega flott og steinveggurinn við höfðalagið gerir gæfumuninn. Veit samt ekki með þessa skrýtnu skápa. Hönnun: Sloom & Slordig.

Bókasafnarar athugið

Ef einhver er að vandræðast með bækurnar sínar (og býr á tveimur hæðum), þá er þetta t.d. ein lausn. Þessar mögnuðu bókahillur eru hönnun Levitate Architects í London.

Our Childrens Gorilla

Our Childrens Gorilla er sænskt fyrirtæki sem framleiðir m.a. þetta fína dúkkuhús, apaherðatré og þessi skemmtilegu plaköt. Litla kistan, Laugavegi 54 er söluaðili hér á landi, svo endilega kíkið til þeirra, annað hvort á Laugaveginn eða í vefverslunina.

Afar hressileg litasamsetning

Þetta eru þau flottustu fyrirlestrarsæti sem ég hef séð. Látið mig endilega vita ef þið kannist við þetta, því ég get ekki munað hvar ég fann þessa mynd.

Rammar á vegg

Þegar ég fletti nýja IKEA-bæklingnum um daginn stoppaði ég við Slätthult-límmiðana. Mér fannst svolítið skrýtið að vera að setja í framleiðslu límmiða sem eru nánast alveg eins og partur úr veggfóðrinu Familjen sem er hannað af Lisu Bengtsson. Og ekki nóg með það, þá er annað veggfóður: Frames, hannað af Taylor & Wood einnig í gangi. Það ætla greinilega margir að græða á þessari annars ágætu hugmynd.

Sænsk hönnun

Mig langar til að vekja athygli á þessum dásamlegu farartækjum sem eru framleidd af fyrirtækinu Playsam. Þau eru ekki fáanleg hér á landi en fást í helstu hönnunarverslunum Skandinavíu. Þetta eru svona gæða tréleikföng (ekki ódýr) sem foreldrar elska.

Dishbunny

Designtorget í Stokkhólmi selur allskonar skemmtilega hluti, m.a. þessa fínu kanínuuppþvottagrind (hönnun Chris Koens) sem mig dauðlangar í. Ég er nefnilega viss um að hún myndi svínvirka hér á heimilinu og veita mér ómælda ánægju við eldhússtörfin.

Frístandandi speglar

Ég var að leita að frístandandi spegli um daginn og rakst þá á þessa tvo sem mér finnast ansi fínir. Sá á efri myndinni er frá Desalto en hinn frá Swedese (fæst í Epal).

40-50 ára Eames-stólar

Ég rakst á smáauglýsingu á Mbl.is þar sem að upprunalegir Eames-stólar (40-50 ára gamlir) úr trefjagleri, eru auglýstir til sölu. Þarna eru á ferðinni Dúsa og Arnar í Skaparanum og ég verð að hrósa þeim fyrir framtakið. Það er frábært að einhver sjái sér hag í því að flytja inn svona fallega notaða hluti. Og ég vona að fólk kunni að meta það, því þessir Eames-stólar sem eru á myndinni, DSW, DSX og RAR-ruggustóllinn eru miklu fallegri í sínu upprunalega trefjagleri heldur en í því plasti sem þeir eru framleiddir úr í dag.

Noma í Kaupmannahöfn

Veitingastaðurinn Noma er tveggja stjörnu Michelin-staður staðsettur í gömlu pakkhúsi í Christianshavn (eini tveggja stjörnu staður Danmerkur). Það hlýtur að vera draumur einn að eiga þarna kvöldstund því maturinn er án efa frábær og dekorinn ekki síðri. Hönnun staðarins var í höndum Signe Bindslev Henriksen sem er einn af eigendum Space-arkitektastofunnar í Kaupmannahöfn. Ótrúlega sjarmerandi staður.

Fimmtíu ára afmæli PH 5

Það er ekki nóg með að Eggið og Svanurinn séu orðin fimmtíu ára heldur er PH 5 lampinn það líka. Og í tilefni af því kynnti Louis Poulsen nýverið fimm nýja liti af lömpunum: hvítan, svartan, rauðan, ljósgrænan og ljósbláan, alla háglans lakkaða. Mér líst voða vel á þann svarta ... en mun láta mér nægja minn gamla rauða sem er löngu hættur í framleiðslu.

Acapulco-stóllinn

Acapulco-stóllinn, sem framleiddur er af Oficina Kreativa, er endurgerð af mexíkönskum stól sem kom á markað á sjötta áratug síðustu aldar. Oficina Kreativa er danskt fyrirtæki með aðsetur bæði í Kaupmannahöfn og Mexíkó. Stóllinn kom á markað í vor og hefur verið í sölu í sumar í helstu hönnunarverslunum Kaupmannahafnar s.s. Illums Bolighus, Normann Copenhagen og Casa Shop. Þetta virkar afar skemmtilegur stóll og ekki svo dýr, 1880 dkk.

Sommar-rúmteppi

Í dag fór ég í IKEA og fann þetta dýrindis rúmteppi á útsölu á 1990 kr. Það er ótrúlega fallegt og ég er alsæl með kaupin. Stærðin á því er 150x250 cm, þannig að það nær yfir helminginn af rúminu. Svo mætti kaupa annað til, sauma þau saman og fá þá draumateppið yfir hjónarúmið á 3980 kr.

Innskotsborð frá 1927

Talandi um innskotsborð þá eru hér dýrleg borð sem geta lífgað upp á stofur landsmanna. Þau eru hönnuð árið 1927 af Josef Albers og framleidd í dag af Vitra.

Tablo bakkaborð

Sænska fyrirtækið Design House Stockholm framleiðir marga skemmtilega hluti. Þar á meðal er bakkaborðið Tablo sem má nota bæði úti og inni, sem hliðarborð, ávaxtaskál eða jafnvel fuglabað. Ég er mjög hrifin af svona fjölnota hlutum og hef dáðst af þessu borði í nokkur ár. Kisan selur vörur Design House Stockholm á Íslandi.

Svanurinn 50 ára

Það eru komin 50 ár síðan að Arne Jacobsen hannaði Eggið og Svaninn fyrir SAS Royal-hótelið í Kaupmannahöfn. Frá því í vor hefur áherslan verið á afmæli Eggsins og sérstök Afmælisegg voru í sölu af því tilefni. Í haust verður svo tími Svansins, sem er ekki síður fallegur stóll. Fritz Hansen-menn og konur ákváðu að framleiða 1958 stk. af hvítum leðursvönum (sem eiga að minna á alvöru svani) og ég efast ekki um að Epal hafi tryggt sér nokkur stykki. Hafið því augun opin. En þeir hjá Fritz Hansen fengu aðra hugmynd (töluvert síðri að mínu áliti) og það er að bjóða upp á hærri útgáfu af Svaninum, hækka hann um 8 cm og koma honum þannig í flokk fundar- og borðstofustóla. Hljómar mjög furðulega.

Soho House New York

Soho House í New York er einkaklúbbur og hótel með 24 herbergjum. Studioilse sá þar um innanhússhönnun (rétt eins og á veitingastaðnum Mathias Dahlgren) og þetta er greinilega klúbbur fyrir mig. Ótrúlega sjarmerandi.

Mathias Dahlgren Stokkhólmi

Veitingastaðurinn Mathias Dahlgren á Grand Hótel í Stokkhólmi var í fyrra endurhannaður af stúdíói Ilse Crawford (sem var í mörg ár ritstjóri breska Elle decoration) Studioilse. Þar hefur vel tekist til og væri spennandi að koma við í næstu Stokkhólmsferð.

Züny leðurdýr

Ég var að fletta nýjasta Bo bedre og rakst þar á þessa ægilega sætu mörgæs. Hana má nota sem bókastoð, hurðastoppara eða bara til skrauts. Framleiðandi er Züny en tímaritið bendir á heimasíðu heildsölunnar Edo í þessu samhengi, en þar má finna allskyns dót m.a. vini hennar flóðhestinn og ísbjörninn.